Les images de la graduation de la premier promotion de l'ecole Biblique PROFESAME

Cette ceremonnie a eu lieu le dimanche 14 juillet 2013 (8h-10ham) a l'eglise Bethesda de Liancourt dirigee par Past Joseph Atson, au 8e jour de la 6e edition de L'Evangile de Transformation, organise par PROFESAME depuis fevrier 2013.
Parmi les 10 etudiants, seuls 8 ont ete certifies en Evangelisation.
Cette promotion s'appelle PETRA.
La session avait dure 3 mois.

Eske w fet yon dezyem fwa deja?

Depi lè Adan ak Èv te fin peche, lanmò antre nan limanite.  Tout  moun ki fèt gen yon sèl destine: lanfè. Rezon an se paske se peche nou yo ( Women 3.23 ;6.23). Pou kèk nan nou, peche se sa konsyans nou repwoche nou, sa fè nou viv daprè jan nou vle, jan nou leve e daprè sa moun ap di. N’ap viv nan yon syèl kote lòm kreye pwòp lwa li e meprize kòmandman Bondye yo. Yo kwè nan egzistans Bib la, men pa nan aplikasyon sa Bib la di. Konsa, men sa Jezi te di Farizyen yo :  « Nou mete kòmandman Bondye yo sou kote pou nou swiv koutim moun etabli »(Mak 7.8-9). Fè yon ti reflechi pou w wè si egzakteman se pa koutim lòm anpil kretyen ap swiv olye yo fè sa Bondye di nan Bib la. Lè Jezikri te fè pwomès pou legliz la (Matye 16.18), Li pa t fè lide gwo kay pou kokenn chenn moun vin montre kapasite entèlektyèl yo, lògèy yo ak foli yo genyen, men Li te panse ak reyinyon anpil moun k’ap sèvi Papa Li sou latè. Sa tèlman reyèl ke lè L’ap tounen, Li p ap vin pran kretyen nan legliz, men se kretyen ki te mouri nan kwayans Li (1 Tesalonisyen 4.16-17). Lè jijman an va fini tou, se pa kay yo ki pral kraze menm jan ak 12 janvye 2010, men se tout moun ki pat kwè yo ki pral boule nan lanfè (Apokalips 20.14-15). Si w wè ke tout bagay sa yo se laverite, kisa w dwe fè ? Eske w dwe kontinye ap viv nan inyorans? Asireman non, e Bondye pa swete sa (2 Pyè 3.9). Men sa w dwe konnen!

Nou tout se pechè. Kit nou pat janm vòlè, tiye, blese oubyen yon vye bagay depi lè nou te fèt, nou rete pechè. Nou te mèt bay tout byen nou genyen, tout bon jan nou te ka genyen, nou se pechè. Nou te mèt peye pou bati legliz nan lemond antye ak ede moun ki nan pwoblèm, nou pa plis ke pechè. Nou te mèt fèt nan yon fanmi kretyèn, papa nou se pastè, tout jounen n’al legliz, nou preche, nou jene, nou priye, n’al nan misyon elatriye, nou pap janm yon lòt moun ke pechè. Poukisa ? Paske nou fèt pechè, e Bondye vle nou rekonèt ke se sa nou ye menm (1 Jan 1.8-9). Se sa ki fè, yon moun ki panse li ka sove paske l’ap fè zèv, li nan erè. Rezon an senp ! Jezi t’ap pale ak Nikodèm ki se yon chèf jwif yo, Li te di li : « Pèsonn pa kapab wè Peyi kote Bondye Wa a si li pa fèt yon dezyèm fwa» (Jan 3.3). Pandanke anpil predikatè ap anonse Bòn Nouvèl la (Jan 3.16), yo pa pran san yo pou eksplike ki sa sa vle di fèt yon dezyèm fwa a e gen dèmilyon moun ki di y ap sèvi Bondye, y ap sove, yo se kretyen men ki poko fèt yon dezyèm fwa. E si yon moun pa fèt yon dezyèm fwa, li pap ka sove. Lè w fèt yon dezyèm fwa, se lè Sentespri Bondye a vin abite nan lavi nou, li fè nou tounen pitit Bondye(Women 8.14-16), e koulye a peche nou yo pap ka mennen nou nan lanfè ankò paske lè Bondye fin sove nou pa gen ni moun, ni okenn bagay ak fòs sou latè ki ka kondane nou (Women 8.1, 33-39). Si w mouri jodi a san w pa fèt yon dezyèm fwa, ou pral boule nan lanfè, se Bib la ki di sa, men mwen avètiw jodi a pou w evite lanfè, paske Bondye pat kreye nou pou n sèvi satan. Se dezobeyisans nou ki fè n’ap viv lwen Bondye e se chak jou L’ap rele nou pou n tounen vin jwenn Li (Travay 2.38), tout sa se koz lanmou Li gen pou nou.

Sa ka rive w legliz lontan, ou renmen li Labib e w priye ak jene souvan, men si w poko fèt yon dezyèm fwa, w ap peri lè w fin mouri. Eske w pa ta renmen konnen si w fet yon dezyèm fwa ? Sa pa entèrese w ? Mwen gen 2 konsèy pou ou ki vo plis pase lò ak dyaman.

1.      Konsilte yon anseyan nan levanjil oubyen yon kretyen ki gen konesans nan Bib la eksplike w gwo mirak sa a ki prèske pa preche ankò. Chache konprann e poze kesyon pou jiskaske w dakò.

2.      Si w pa jwenn oubyen w ta renmen konnen plis toujou, ou ka rekòmande yon etid espesyal sou Fèt yon dezyèm fwa nan PROFESAME. Sa pap koute w pyès kòb, e n’ap pran tan nou pou n eksplike tout sa ki esansyèl pou w konnen pou w ka sove.

Apre lanmo, pa gen repantans!

(1) Anpil moun kwè ke apre lanmò, tout bagay fini, kifè pa gen pyès jijman pou voye moun nan lanfè paske Bondye pa mechan (1 Jan 4.8). (2) Gen lòt moun ki kwè tou ke gen yon jijman apre lanmò (Ebre 9.27), men sa pa anpeche tou genyen ladan yo ki ap viv nan rebelyon ak Bondye. (3) Gen yon lòt kategori menm ki di y’ap konvèti men fòk yo fin jwi nan lemond. (4) Konsa tou, genyen ki di si y ap sove, yo pa ka peri, Bondye ap fè sa avan yo mouri. (5) Nou p ap bliye, anpil moun ki di yo pa bezwen sove paske yo p ap trayi sa y ap sèvi a. (6) Men sa ki pi dwòl la, se moun ki panse y ap sove, epi ki pral pran malonèt devan pòt syèl la.(Matye 7.21-27). Nan 6 kategori moun sa yo, kiyès ou ye? E kennenpòt sa w ta ye a, nou gen yon mesaj pou ou.

Depi nan jaden Edenn, apre gran paran nou yo te fin peche, men sa Bondye ki gen tout pouvwa a te di yo: « Se pousyè ou ye, ou gen pou w tounen nan pousyè ankò » (Jenèz 3.19). Pa bliye ke lòm pa gen kò sèlman, men li gen lespri ak nanm (1 Tesalonisyen 5.23). Kidonk, moun ki di apre lanmò tout bagay fini an li gen rezon paske kò sa a se pousyè, l’ap tounen nan pousyè e se nan tonbo a li fini. Men kisa k ap pase pou nanm nan ? Tande sa Jezi di : « Nou pa bezwen pè moun ki kapab touye kò nou, men ki pa kapab touye nanm nou. Se Bondye pou nou pè pito, paske Li menm Li kapab detwi nanm nan ansanm ak tout kò nou nan lanfè » (Matye 10.28). Pou lòt 5 kategori moun yo, men ki kesyon Jezi poze yo : « Kisa sa ta sèvi yon nonm pou l ta genyen lemonn antye si l pèdi lavi li ? Kisa yon moun kapab bay pou l gen lavi ? (Matye 16.26).

Se pa paske nou rayi yon moun ki fè nou mennen l lopital lè li malad, nou metel nan mòg lè li mouri ak antere li nan simityè, se paske se yon obligasyon. Kidonk, malgre jan nou ta renmen yon moun : madanm, pitit, frè, sè, ...depi li mouri, se nan simityè n ap antere l. Menm jan an tou, malgre jan Bondye ta renmen nou (Jan 3.16), si nou mouri san n pa aksepte Kris, se nan lanfè L’ap mete nou (Apokalips/Revelasyon 20.12-15).

Zanmi mwen, di Bondye mèsi ,si l pèmèt ou jwenn mesaj sa a paske gen anpil moun ki ta renmen konnen l, men yo pa ka jwenn li. Pa koute lògèy ou, men koute yon vwa k’ap di nan ou menm : « Repanti avan lanmò vini, paske aprè ou p ap gen chans ». Nonm rich la te rate chans sa a, men li te di Abraram konsa : « Mwen gen 5 frè, mwen ta vle l’al di yo jan bagay la ye pou yo pa vin isit nan touman sa a » (Lik 16.28). Kiyès ki ta nan yon danje, epi ki t ap di zanmi l vini tou, se sèlman yon mechan. Nonm rich la t ap pran plezi li sou latè, men l pa t okipe Bondye. Nan lanfè, li te jwenn rekonpans li, e Laza ki te pòv te jwenn rekonpans li tou nan sen Abraram. Msye te bezwen pou Abraram voye youn nan mò yo al di frè l yo sa paske yo p ap koute Moyiz ak pwofèt yo, men Abraram di li: “ Si yo pa koute Moyiz ak pwofèt yo, yo p ap kite pèsonn lòt fè yo kwè verite a. Li ta mèt yon mò ki ta leve vivan ankò, yo p’ap koute li.” (v30).

Se sa k’ap pase jounen jodi a. Anpil moun ap di ke lanfè pa egziste paske pa janm gen yon moun ki mouri ki vin di kòman sa ye. Enben, Jezi te vle fè nou konnen ke menmsi yon mò ta leve nan simityè vin preche levanjil, gen moun ki p ap kwè pi rèd. Yo ta pito bay pretèks sou pretèks: se pa vre, moun nan pat mouri, pa okipe l, se manti l’ap bay.

Eske w prè pou al peri ? Ou dakò pase tout vi w ap soufri sou latè epi pou w al soufri nan lanfè? Kisa a w deside ? E w dwe deside koulye a menm, paske apre lanmò, ou pa gen chans pou w repanti menm jan ak move rich la. E lanmò vini sanzatann.

Si w ta vle konprann plis kòman pou w evite lanfè sa a, ou ka fè 2 bagay:

(1) Kote w ye a, di ak tout kè w “Bondye, mwen rekonèt mwen se pechè e Jezi te vin mouri nan plas mwen. Mwen regrèt tout sa m te fè ki mal, e mwen mande w pou w vin rete nan lavi m koulye a’’. Nou garanti w ke si w fè sa ak tout kè w, Bondye gentan padone w.

(2) Nou konseye w vin swiv ansèyman nou yo pou w ka sèten de padon sa a ak konnen kòman pou w kontinye sèvi Bondye jan sa ekri nan Bib la.

Ou se yon moun espesyal ! Nanm ou enpòtan pou Bondye !

Jerome Dorsonne Emerson